Մաքսային արժեք ասելով հասկանում ենք ապրանքը ձեռք բերելու և ՀՀ տեղափոխելու համար վճարված գումարը կամ վճարվելիք գումարը։

Ապրանքների ներկրման համար սահմանվում է մաքսային արժեք, որը հիմք է հանդիսանում մի շարք այլ գործարքների համար։ Օրինակ՝ մաքսային վճարների հաշվարկման, մաքսատուրքերի սահմանման կամ ԱԱՀ-ի։

ՀՀ-ում ներմուծվող ապրանքների մաքսային արժեքը բաղկացած է մի շարք բաղադրիչներից: Հիմնական բաղադրիչը ապրանքի գնման արժեքն է, սակայն կան նաև այլ գործոններ, որոնք ազդում են վերջնական մաքսային արժեքի վրա:

Այդ գործոնների մեջ են մտնում՝

• Տրանսպորտային ծախսերը մինչև ՀՀ սահման, ներառյալ բեռնափոխադրումը, բեռնման և բեռնաթափման ծախսերը, ապահովագրությունը և այլ հարակից ծախսեր:
• Միջնորդավճարները և կոմիսիոն վճարները, որոնք կատարվել են մինչև ապրանքի՝ ՀՀ սահման հասնելը:
• Փաթեթավորման նյութերի և աշխատանքի արժեքը:

Հարկ է նշել, որ որոշ ծախսեր չեն ներառվում մաքսային արժեքի մեջ: Օրինակ՝ արտահանող երկրում վճարված անուղղակի հարկերը, ինչպես նաև ՀՀ-ում կատարված ծախսերը, ինչպիսիք են բեռնաթափման ծախսերը կամ ՀՀ-ում գանձվող հարկերն ու տուրքերը:

Հայտարարատուն կամ նրա լիազորված անձն է որոշում և հայտարարում ապրանքի մաքսային արժեքը, իսկ մաքսային մարմինները գնահատում են ներկայացված արժեքի ճշտությունը:

Մաքսային մարմինների կողմից հայտարարված արժեքի ընդունման համար անհրաժեշտ են մի շարք պայմաններ՝

• Ապրանքի ձեռքբերումը հաստատող փաստաթղթերի առկայություն:
• Բավարար տեղեկատվություն՝ ապրանքի գնի ճշգրտման համար:
• Ապրանքի օգտագործման սահմանափակումների բացակայություն:
• Վաճառողի և գնորդի միջև փոխկապակցվածության բացառում, կամ եթե կա փոխկապակցվածություն, ապա պետք է բավարար փաստերով ապացուցել, որ դա չի ազդել գնի վրա:

մաքսազերծման հաշվիչ

Ի՞նչ փաստաթղթեր են անհրաժեշտ

Մաքսային արժեքի հաշվարկման համար կարևոր է ներկայացնել հետևյալ փաստաթղթերը՝

1. Կազմակերպությունների և անհատ ձեռնարկատերերի համար՝

ա) Մաքսային հայտարարագիր և անհրաժեշտության դեպքում՝ մաքսային արժեքի մանրամասնությունների հայտարարագիր (հայտնի որպես ՄԱՀ):

բ) Ապրանքի ձեռքբերումը հաստատող փաստաթուղթ՝ հաշիվ-ապրանքագիր (ինվոյս), պայմանագիր կամ համարժեք այլ փաստաթուղթ:

գ) Ապրանքի տեղափոխման փաստաթուղթ, օրինակ՝ ապրանքատրանսպորտային բեռնագիր (CMR կամ այլ բեռնագիր):

դ) Ոչ սակագնային կարգավորման փաստաթղթեր՝ թույլտվություններ, լիցենզիաներ, հավաստագրեր (սերտիֆիկատներ), եզրակացություններ և այլն:

ե) Ակցիզային հարկով հարկման և պարտադիր դրոշմավորման ենթակա` ներմուծված ապրանքների համար ակցիզային դրոշմանիշերի ձեռքբերման անդորրագիրը և ձեռք բերված ակցիզային դրոշմանիշերի օգտագործման մասին հաշվետվությունը։

զ) Մաքսային վճարների կատարումը հաստատող փաստաթղթեր կամ վճարման երաշխիքներ:

2. Ֆիզիկական անձանց համար՝

ա) Մաքսային հայտարարագիր և անհրաժեշտության դեպքում՝ մաքսային արժեքի մանրամասնությունների հայտարարագիր (ՄԱՀ):

բ) Ապրանքի ձեռքբերումը հաստատող փաստաթուղթ՝ հաշիվ-ապրանքագիր (ինվոյս), պայմանագիր կամ համարժեք այլ փաստաթուղթ:

գ) Ոչ սակագնային կարգավորման փաստաթղթեր՝ թույլտվություններ, լիցենզիաներ, եզրակացություններ, հավաստագրեր (սերտիֆիկատներ) և այլն:

դ) Մաքսային վճարների կատարումը հաստատող փաստաթղթեր կամ վճարման երաշխիքներ:

Այս փաստաթղթերի ճիշտ և ժամանակին ներկայացումը կարող է զգալիորեն արագացնել մաքսազերծման գործընթացը և խուսափել հնարավոր խնդիրներից:

մաքսազերծման հաշվիչ

Ինչպե՞ս կիրառել մաքսազերծման հաշվիչը

Ապրանքի գինը դաշտում անհրաժեշտ է մուտքագրել մաքսազերծվող ապրանքի գինը՝ այն արժույթով, որով կնքվելու է պայմանագիրը (ներառված են ՀՀ դրամ, ԱՄՆ դոլար, ռուսական ռուբլի, եվրո)։

Հաջորդ դաշտում ավելացնում եք փոխադրման ծախսերը, բեռը արտերկրից մինչև ՀՀ սահման տեղափոխելու համար, ներառելով նաև բեռնման և բեռնաթափման ծախսերը՝ այն արժույթով, որով կնքվելու է պայմանագիրը (ներառված են ՀՀ դրամ, ԱՄՆ դոլար, ռուսական ռուբլի, եվրո)։

Բեռի ապահովագրություն դաշտում պետք է ավելացնել բեռի հետ կապված բոլոր ապահովագրական ծախսերը՝ այն արժույթով, որով կնքվելու է պայմանագիրը (ներառված են ՀՀ դրամ, ԱՄՆ դոլար, ռուսական ռուբլի, եվրո)։

Այնուհետև, լրացնելով բեռի համախառն քաշը, որը կհաստատվի ապրանքատրանսպորտային բեռնագրում (CMR կամ այլ), նշելով ԱԱՀ դրույքաչափը (20% կամ 0%), մաքսատուրքի դրույքաչափը և սեղմելով հաշվել կոճակը հաշվիչն ավտոմատ կերպով կներկայացնի ձեզ ապրանքի ներմուծման արդյուքում առաջացող վճարների չափը՝ առանձին ներկայացնելով ապրանքի մաքսային արժեքը, վճարվելիք մաքսատուրքերի, ավելացված արժեքի հարկի (ԱԱՀ) և մաքսավճարների չափը։