Եկամտային հարկ

1. Եկամտային հարկի էությունը և հարկ վճարողները

Եկամտային հարկը պետական բյուջե վճարվող ուղղակի հարկատեսակ է, որով հարկվում են ֆիզիկական անձանց ստացած եկամուտները։

ՀՕ հոդված 139

Հարկ վճարողներ են հանդիսանում՝

Ռեզիդենտ ֆիզիկական անձինք՝ անձինք, որոնք հարկային տարում ՀՀ-ում փաստացի գտնվել են 183 կամ ավելի օր, կամ որոնց կենսական շահերի կենտրոնը գտնվում է ՀՀ-ում։

Ոչ ռեզիդենտ ֆիզիկական անձինք

Անհատ ձեռնարկատերերը (ԱՁ) և նոտարները՝ բացառապես իրենց անձնական եկամուտների մասով։

ՀՕ հոդված 140

2. Հարկման օբյեկտը և հարկման բազան

Հարկման օբյեկտ

Հարկման օբյեկտ է համարվում ֆիզիկական անձանց ստացած համախառն եկամուտը։

• Ռեզիդենտների համար՝ ՀՀ-ում և ՀՀ սահմաններից դուրս (համաշխարհային աղբյուրներից) ստացված բոլոր եկամուտները, բացառությամբ ՀՀ-ում հաշվառված ԱՁ և նոտարների ձեռնարկատիրական եկամուտների։
• Ոչ ռեզիդենտների համար՝ բացառապես ՀՀ աղբյուրներից ստացված եկամուտները, բացառությամբ մշտական հաստատության միջոցով ՀՀ-ում գործունեություն իրականացնող և (կամ) ՀՀ աղբյուրներից եկամուտ ստացող ոչ ռեզիդենտ ֆիզիկական անձանց մշտական հաստատությանը վերագրվող եկամուտների, ինչպես նաև արտաքին տնտեսական գործունեությունից ստացվող եկամուտների։

ՀՕ հոդված 141

Եկամուտների հիմնական տեսակները

• Աշխատանքային եկամուտներ (աշխատավարձ, պարգևատրումներ, հավելավճարներ),
• Քաղաքացիաիրավական պայմանագրերով ստացված եկամուտները (ծառայությունների մատուցում, աշխատանքների կատարում),
• Պասիվ եկամուտներ (տոկոսներ, ռոյալթիներ, շահաբաժիններ, վարձակալական վճարներ),
• Գույքի օտարումից ստացվող եկամուտներ:

ՀՕ հոդված 144

Հարկման բազա

Հարկման բազան հարկման օբյեկտի դրամական արտահայտությունն , որի նկատմամբ կիրառվում են սահմանված դրույքաչափերը։

Հարկման բազան = Համախառն եկամուտ – Նվազեցվող եկամուտներ

3. Եկամտային հարկի դրույքաչափերը

ՀՀ Հարկային օրենսգրքով սահմանված են եկամտային հարկի տարբերակված դրույքաչափեր՝ կախված եկամտի աղբյուրներից և բնույթից։

20%՝ կիրառվում է

• Աշխատավարձի, դրան հավասարեցված վճարումների և քաղաքացիաիրավական պայմանագրերով ստացված եկամուտների նկատմամբ,
• Կառուցապատողի կողմից շենքի, դրա բնակարանների կամ այլ տարածքների օտարումից ստացված եկամուտների նկատմամբ,
• Անհատ ձեռնարկատեր և նոտար չհանդիսացող ֆիզիկական անձանց հարկային գործակալի կողմից վճարվող պասիվ եկամուտների նկատմամբ։

10%՝ կիրառվում է պասիվ եկամուտների մեծ մասի նկատմամբ․

• Բանկային ավանդների և արժեթղթերի տոկոսներ,
• Ռոյալթիներ,
• Գույքի վարձակալությունից ստացվող եկամուտներ (բացառությամբ տարեկան 60 միլիոն դրամը գերազանցող մասի համար կիրառվում է լրացուցիչ 10% դրույքաչափ),
• Գույքի օտարումից ստացված եկամուտներ (բացառությամբ կազմակերպության կանոնադրական կամ բաժնեհավաք կապիտալում կամ պայմանագրային ներդրումային ֆոնդում գույքի ներդրումը):

5%` կիրառվում է ստացված շահաբաժինների (դիվիդենդների) նկատմամբ։

1%՝  կիրառվում է կրիպտոակտիվների օտարումից ստացվող եկամուտների նկատմամբ։

ՀՕ հոդված 150

Եկամտային հարկի հաշվարկների և այլ փաստաթղթերի ներկայացումը և հարկի վճարման ժամկետները

4. Եկամտային հարկի արտոնությունները և նվազեցումները

Օրենսդրությամբ նախատեսված են ինչպես եկամտային հարկից լրիվ ազատման, այնպես էլ վճարված  հարկի հետվերադարձի (փոխատուցման) արտոնություններ։

1. Նվազեցվող (չհարկվող) եկամուտներ

Այս եկամուտները չեն ներառվում հարկման բազայում

Սոցիալական․ Կենսաթոշակներ, ալիմենտներ,պատվովճարներ, դոնորության վճարներ, սոցիալական օգնություն։

Զինծառայողների․ Զինծառայության հետ կապված ոչ դրամական բավարարում, ժամկետայինների դրամական ապահովություն, զոհված/ հաշմանդամ զինծառայողների ընտանիքների միանվագ վճարներ և վնասի փոխհատուցումներ։

Գույքի օտարում․ Ֆիզիկական անձից ստացված ժառանգություն/ նվիրատվություն, ինչպես նաև սեփական ավտոմեքենայի կամ անձնական գույքի վաճառք (եթե ձեռնարկատիրական չէ)։

ԵՎ այլն․․․

Հարցերի և խորհրդատվության համար կարող եք զանգահարել +374 33 701600  հեռախոսահամարով՝  «Բեսթ Լոջիք»  հաշվապահական ընկերություն։